م. أحمد فؤاد
نحن بنغرق ليه؟(2)
2019
#ونسة
#نحن_بنغرق_ليه
#حنبنيهو
#تسقط_تاني
المرة الفاتت اتكلمنا عن انه الخرطوم بتقع بين خطين لتقسيم المياه واحد شرقي بينها و بين البطانة و واحد غربي بينها و بين كردفان، المنطقة دي ممكن نصفها تجاوزا(المصطلح اعقد من كده) بي انها "حوض النيل".واللي هي بدورها بتنقسم لي أحواض صغيرة(تجاوزا برضو) بتتجمع منها مياه الامطار و بتغذي خيران موسمية بتصب في النيل.
أقرب مثال للخيران دي خيران امدرمان زي خور ابوعنجة مثلا. نظرة سريعة على الصور بتاعت قوقل مابس بتوري انه الخيران دي عددها اكبر بكتير مما نحن عادة بنتصور. و ده احتمال لأنها موسمية و لأنه اغلب مساراتها في الخلا و ما بتدخل المدن الا قريب مصبها في النيل. انا شخصيا ما فكرت فيها الا لمن بديت اهتم بموضوع الغرق و السيول.
الخيران دي في احيان بتفرغ مياه الامطار من احواض ذات مساحات كبيرة اعتقد انه اكبرها هو وادي سوبا (شرق) حوض وادي سوبا ده مساحته اكتر من 1300 كلم مربع. و كل ما كبرت مساحة الحوض زادت كمية الأمطار البيستقبلها وكمية المياه البيفرغها في النيل (تقريبًا).
الخيران دي حفرت مساراتها خلال سنين طويلة جداً وبتجمع السيول من نفس المنطقة لسنين طويلة جدا ووصلت لدرجة كبيرة من الاستقرار في مجاريها بمعنى انه مجاريها معروفة و ما بتتغير.
طيب...
مادامت الخيران دي حافرة مساراتها و مستقرة فيها و بتمر بيها كل موسم امطار...
البيتغير شنو و بيخلي الخيران دي تغرق بيوت الناس في منطقة ما متعودة على الغرق؟
لو لاحظتو كل سنة بتتضرر منطقة ما اتضررت قبل كده
بالمقابل السنة دي اول مرة نسمع بي سيول و اضرار في ود رملي. و الجيلي ليها سنين ما غرقت مثلاً في حين انه الكرياب و المرابيع غرقت في 2013 لأول مرة تقريباً.
الكيزان كانو مصرين انه المواطنين بيسكنو في مجاري السيول القديمة (الخيران) و السيل "فجأة" بيرجع لي مجراه و بيشيل بيوتهم.
مرات بيقولو انه امطار غير مسبوقة!
لكن إذا كانت الامطار غير مسبوقة في 88 و 91 و 92 و 96 و 2002 و 2012 و2013 و 2016 و 2019(ودي كلها سنين كوارث) تبقى دي امطار "متعودة دايما"
ولا شنو؟
الخرائط المرفقة من انتاج زملاء استخدمتها بدون استئذان، حقهم الادبي محفوظ زي حقهم في الخصوصية
نواصل
つづく
ليست هناك تعليقات:
إرسال تعليق